受訪年份 | 2015
花燈師傅話當年
隔田村的祠堂裏，懸掛了一台比人高的大花燈，層層相疊，綴滿裝飾，主體呈八角形，每一角貼一幅圖畫紗紙，是傳統花燈格局。
「呢款係中三元咋，唔算大喇。」其中一位村長曾坤達坦言。
他說的是花燈規格，最大叫大八角，大三元次之，中三元再次之，最小叫斗燈。按此製作，便能往店子配上尺碼剛好的紗紙。然後在頂上加冠，底下加座，即使是中三元，亦已龐然。達哥每次做布置，都要爬木梯，掛燈又要拉吊索，非常大陣仗，「所以依家好少地方掛咁大盞燈喇，但我哋同曾大屋都仲有。」兩盞大花燈，皆出自他手，這手藝他自幼學來，幾乎成了碩果僅存。
「我八歲整到而家五十八歲，係呢十幾年先擔正！以前跟叔公學，都係做下欄嘢，破竹、削竹、煮漿糊、黐字……」單單是紮燈架的竹枝，便得來不易，「做主幹嗰四枝竹呀，一定要直。碌竹開出嚟唔夠直，就要吊上樹，綁啲重嘢拉直佢。再唔係用火彈。」做框架的竹篾，要逐條削；貼紗紙的漿糊，要自己煮，把米飯煮個稀巴爛，取其黏力。
那個年代，鄉村人凡事親手做，熱騰騰的飯糊冷卻後，大夥兒便圍在一起做美工字。「用香雞將紙捲成一條條好幼，又剪又屈，黐上花燈，變成一個個凸字，例如百子千孫，立體㗎！幾有氣勢！」來到這年頭，各人已年邁，年輕人又事忙，做不來這些鎖碎。人手砌字早沒了；油燈燈盞，亦已換成電燈泡。幾年前，竹紮燈架也被鋁架取代。但他堅持花燈要做得架勢。
「橫掂轉用鋁架，我就做個拆得開嘅燈冠，等佢大啲、架勢啲。」原來花燈因要進出祠堂，大小受限制，將燈冠變成可拆除、獨立搬運，便能大大加闊，可以貼更多裝飾。
如今達哥做的花燈，自成一格，閃爍花紙、彩色花球、吊穗等層出不窮。傳統細節也顧及，八角燈上那套紗紙，印滿吉祥故事，天官賜福、引福歸堂、捷報連元……大花燈下，按前一年村內男丁出生量，連繫若干斗燈；每盞斗燈再垂掛薑、䓤、芹菜、生菜、芋頭等吉祥物，寓意開枝散葉、聰明伶俐、百子千孫。
盞盞斗燈，對晚輩寄送祝福；其上的大燈，則滿載長輩對承傳的寄望。
